Në lidhje me një informacion të shpërndarë në media për lobimin e Partisë Demokratike pranë Qeverisë dhe Kongresit të SHBA, dëshirojmë të sqarojmë sa vijon: Komuniteti shqiptaro-amerikan, përmes fondacionit “Make Albania Great Again”, ka kontraktuar kompaninë “Continental” për të ndihmuar në forcimin e marrëdhënieve miqësore të Partisë Demokratike, si forca më e madhe opozitare në Shqipëri, me Kongresin dhe Qeverinë e Shteteve të Bashkuara.
Qëllimi i bashkatdhetarëve tanë në SHBA është të nxisin bashkëpunimin e Partisë Demokratike me aleatin strategjik të Shqipërisë, në funksion të rivendosjes së demokracisë funksionale dhe shtetit të së drejtës në vendin tonë. Kompania “Continental”, e cila do të realizojë këtë angazhim, drejtohet nga Ambasadori Carlos Trujillo, i njohur si një ndër mbështetësit kryesorë të Presidentit Trump dhe si një antikomunist i palëkundur në qëndrimet e tij.
Kontributi financiar për këtë iniciativë është marrë përsipër 100% nga patriotët shqiptarë që jetojnë dhe punojnë prej dekadash në SHBA, si dhe nga demokratët që janë larguar nga Shqipëria gjatë dhjetë viteve të fundit për shkak të regjimit të Edi Ramës. Partia Demokratike, duke shprehur mirënjohjen më të thellë për bujarinë dhe patriotizmin e demokratëve antikomunistë të komunitetit shqiptaro-amerikan, sqaron opinionin publik se, ndonëse ka dhënë dakordësinë për realizimin e kësaj nisme në përputhje të plotë me ligjet e të dy vendeve, nuk ka asnjë barrë financiare dhe asnjë detyrim kontraktual që lind nga kjo marrëveshje.
Kush është “Continental Strategy”
Continental Strategy është një firmë konsulence dhe lobimi me bazë në Shtetet e Bashkuara, e specializuar në marrëdhënie me qeverinë dhe strategji politike. E themeluar në fillim të vitit 2022 nga ish-ambasadori dhe përfaqësuesi shtetëror Carlos Trujillo.
Firma me seli në Uashington DC ka lidhje të ngushta me administratën e Presidentit Donald Trump. Themeluesi Carlos Trujillo ka shërbyer si këshilltar i fushatës së Trump dhe si ambasador i SHBA-së në Organizatën e Shteteve Amerikane.
Continental Strategy ka lidhje të ngushta me Senatorin Marco Rubio përmes Alberto Martinez, i cili u emërua Partner Menaxhues i zyrës së firmës në Uashington, D.C. Martinez ka shërbyer si Shef i Stafit për Senatorin Rubio për një dekadë dhe ka përvojë të gjerë në politikën federale. Emërimi i tij në Continental Strategy është përshëndetur nga Rubio, i cili e ka vlerësuar për përvojën dhe integritetin e tij.
Katie Ëiles është Drejtore në Continental Strategy, me përgjegjësi në zyrat e firmës në Jacksonville dhe Uashington, D.C. Ajo është vajza e Susie Ëiles, një stratege e njohur republikane dhe Shefe e Stafit të Presidentit Donald Trump pas fitores së tij në zgjedhjet e vitit 2024. Përpara se të bashkohej me Continental Strategy, Katie ka shërbyer si Drejtore e Komunikimeve në Bashkinë e Jacksonville gjatë administratës së Kryetarit Lenny Curry.
