Grupi rus i mercenarëve Wagner, i njohur për dështimin e kryengritjes kundër Moskës dhe abuzimet ndaj civilëve në Afrikë, po tërhiqet nga kontinenti, duke lënë vend për një forcë të re paramilitare, Africa Corps. Ky ndryshim shikohet si një “riemërtim strategjik” nga Rusia, e cila dëshiron të ruajë ndikimin e saj në Afrikë, por tani nën kontroll të drejtpërdrejtë shtetëror.
E ndryshme nga Wagner, Africa Corps operon nën Ministrinë ruse të Mbrojtjes dhe përfshin komandantë të elitës nga ushtria ruse, ndonëse ka rekrutuar gjithashtu ish-luftëtarë të Wagner. Forca e re është aktive në vende të Sahelit, si Mali, Nigeri dhe Burkina Faso, duke bashkëpunuar me ushtritë vendase për të luftuar grupe rebele dhe islamiste. Në Republikën e Afrikës Qendrore, ku Wagner ka pasur një prani të fuqishme që nga viti 2018, autoritetet janë këshilluar nga Moska për të zëvendësuar mercenarët me Africa Corps.
Ky tranzicion ndodh pas vdekjes së liderit të Wagner, Yevgeny Prigozhin, dhe pas rebelimit të tij ndaj udhëheqjes ushtarake ruse. Me imazhin e Wagner të ndotur nga akuzat për abuzime, Kremlini synon të “institucionalizojë” praninë ushtarake në Afrikë për të shmangur rreziqet ligjore dhe reputacionale. Megjithatë, ndikimi i Wagner në kontinent mbetet i diskutueshëm, për shkak të akuzave për shkelje të të drejtave të njeriut dhe përfitime nga burimet minerare në këmbim të shërbimeve ushtarake.
Analistët sugjerojnë se ndryshimi i emrit mund të jetë një tentativë e Moskës për të ruajtur funksionet e Wagner nën një etiketë më të pranueshme ndërkombëtarisht. Ndërkohë, situata e sigurisë në Sahel po përkeqësohet, me rritje të aktivitetit terrorist dhe bashkëpunimit me krimin e organizuar. Organizatave si OKB dhe BE kanë kërkuar hetime të pavarura për krimet e supozuara, duke theksuar rrezikun e një krize të thellë që vendet lokale nuk e kanë kapacitetin ta përballojnë të vetme.
