Një gjykatë e Afrikës së Jugut ka refuzuar apelimin e Agjencisë së Trashëgimisë Kulturore për të ndaluar shitjen dhe eksportimin e sendëve që lidhen me Nelson Mandela, figura e njohur e luftës kundër aparteidit. Në mesin e 70 sendeve personale, ndodhen një çelës qelie nga Ishulli Robben, ku Mandela vuajti burgun për 18 nga 27 vitet e tij, një palë syze dielli Aviator dhe një nga këmishat e tij të famshme me lule. Këto objekte ishin planifikuar të eksportoheshin në Shtetet e Bashkuara për një ankand.
Sipas raportimeve të BBC-së, sendet i përkasin vajzës së Mandela, Makaziwe, dhe Christo Brand, rojtarit të Ishullit Robben gjatë burgosjes së tij. Kolëksioni përfshin gjithashtu një kopje të Kushtetutës së Afrikës së Jugut të vitit 1996, nënshkruar nga Mandela, një vizatim i tij me qymyr, një kartë identiteti, dhe një raketë tenisi që ai përdori në burg, si dhe dhurata nga liderë të tjerë botërorë, si ish-Presidenti Barack Obama.
Autoritetet argumentuan se këto objekte janë pjesë e trashëgimisë kulturore dhe janë të mbrojtura nga ligji, duke e bërë të paligjshëm eksportimin e tyre. Agjencia e Trashëgimisë së Afrikës së Jugut (SAHRA) u informua për shitjen e mundshme nga një artikull gazete britanike në fund të vitit 2021, i cili raportoi se çelësi do të shitej për mbi 1 milion paund. Pas këtij lajmi, SAHRA kontaktoi shtëpinë e ankandeve Guernsey, kërkuar që ankandi të pezullohej dhe sendet të ktheheshin në Afrikën e Jugut. Vajza e Mandelës planifikonte të përdorte të ardhurat për ndërtimin e një kopshti përkujtimor mbi varrin e tij.
Në vendim, Gjykata e Lartë e Apelit theksoi se interpretimi i SAHRA-s për Aktin Kombëtar të Pronës Kulturore ishte shumë i gjerë. Megjithatë, nuk dihet ende nëse autoritetet do të kërkojnë rrugë të tjera ligjore për të penguar shitjen. Makaziwe Mandela mirëpriti vendimin e gjykatës, për të cilin ajo tha se ende nuk ishte marrë një vendim për fatin e sendeve të cilat pritej të dilnin në ankand.
