Aeroporti “Nënë Tereza” i Rinasit ka gjeneruar vetëm gjatë vitit 2022 shifrën marramendëse prej 31 milionë eurosh, një shifër tre herë më e madhe se kapitali aksioner.
Sipas kontratës koncesionare, Shefqet Kastrati duhet të investojë në zgjerimin e aeroportit, që me fluksin e madh të turistëve këtë vit është shndërruar si një stacion furgonësh pa vend e orar.
Por deputeti Agron Shehaj thotë se kjo është një aferë korruptive ndër më të mëdhatë, pasi Kastrati ka “futur në xhep” kontratën për zgjatjen e koncesionit me 12 vjet, që do të thotë se ka siguruar fitime të paktën 300 milionë euro.
“Si shumë afera korruptive të tjera, kjo nuk është thjesht një vjedhje e të ardhurave të shtetit por parapërgatitje për blerjen e zgjedhjeve të ardhshme nëpërmjet financimit të mediave, blerjes së votave dhe favoreve elektorale”, shkruan ndër të tjera deputeti Shehaj.
Postimi i plotë i Agron Shehaj:
Aeroporti i Rinasit është një nga pasuritë kombëtare që vetëm në 2022 ka gjeneruar 31 milionë euro fitim.
Kur Rama zgjati afatin e koncesionit me 12 vjet, praktikisht falas dhe pa garë, në thelb transferoi nga arkat e shtetit te Kastrati të paktën 300 milionë euro.
Si shumë afera korruptive të tjera, kjo nuk është thjesht një vjedhje e të ardhurave të shtetit por parapërgatitje për blerjen e zgjedhjeve të ardhshme nëpërmjet financimit të mediave, blerjes së votave dhe favoreve elektorale.
Ky është modeli nëpërmjet të cilit Rama është rizgjedhur 2 herë kryeminister dhe synon të rizgjidhet edhe në të ardhmen.
Kjo aferë korruptive është një shembull konkret që tregon se pari që korrupsioni drejtohet nga kryeministri dhe ai është përfituesi kryesor dhe së dyti që korrupsioni jo vetëm varfëron çdo shqiptar, por ju heq atyre mundësinë për të zgjedhur një alternativë.
