Kryeministri Edi Rama, në një intervistë për “DW”, ka diskutuar mbi integrimin evropian të Shqipërisë, duke theksuar sfidat dhe pritshmëritë për anëtarësimin në Bashkimin Evropian. Ai njoftoi se qeveria po punon sipas një kalendari të miratuar me BE-në, që synon përmbushjen e të gjitha detyrave deri në vitin 2027, kohë kur Komisioni Evropian do t’i rekomandojë vendeve anëtare përmbylljen e negociatave.
Rama theksoi rëndësinë e përmbushjes së këtyre detyrave dhe sqaroi se ky plan nuk është thjesht një dëshirë, por një angazhim i bazuar në një skenar konkret. Ai vuri në dukje një periudhë dyvjeçare pas përfundimit të negociatave, e cila do të nisë procedurën e ratifikimit në vendet anëtare të BE-së, duke sugjeruar që procesi mund të përshpejtohet, por ka vendosur 2030 si një afat maksimal.
Kryeministri nënvizoi se Shqipëria ka bërë përparim të shpejtë në krahasim me vendet e tjera të rajonit që janë gjithashtu në procesin e integrimit, si Maqedonia e Veriut dhe Mali i Zi. Ai shprehu besimin se vendi është tani në “pararojë” së bashku me Malin e Zi, duke u distancuar nga vendet që përballen me probleme më komplekse në këtë proces.
Rama gjithashtu theksoi se ndonëse Shqipëria ka nisur më vonë në këtë garë, tani është duke ecur përpara, për shkak të vështirësive që përballen vendet e tjera, si Bullgaria që pengon Maqedoninë e Veriut për të zgjidhur çështjet e brendshme, dhe problemet midis Kosovës dhe Serbisë për mungesën e njohjes së ndërsjellë. Ai përfundoi duke e cilësuar situatën e Bosnjës si një rast shumë të komplikuar.
Në këtë kontekst, Rama shprehu optimizmin për ecurinë e Shqipërisë drejt integrimit në Bashkimin Evropian dhe rolin aktiv që do të luajë vendi gjatë këtyre negociatave.
