Aeroportet e Vilniusit dhe Kaunasit u mbyllën të premten në mbrëmje për shkak të hyrjes së balonave meteorologjikë nga Bjellorusia në hapësirën ajrore të Lituanisë. Ministria e Transportit njoftoi se pezullimi i operacioneve do të zgjasë deri në orën 22:00, pasi radarët zbuluan dhjetëra balona që po lëviznin drejt territorit lituanez.
Ky incident nuk është i vetmi për aeroportin e Vilniusit, i cili ishte mbyllur përkohësisht edhe më herët gjatë javës, më konkretisht të martën dhe më 5 tetor, për shkak të balonave që transportonin cigare kontrabandë. Kryeministrja e Lituanisë, Inga Ruginienė, njoftoi gjithashtu mbylljen e dy pikave kufitare me Bjellorusinë deri në mesditën e së dielës, duke paralajmëruar se masa të tilla do të mbeten në fuqi në rast incidenteve të ngjashme.
Shqetësimet mbi sigurinë ajrore në rajon janë rritur së fundmi, me funksionimin e disa aeroporteve evropiane që është ndërprerë përkohësisht për shkak të pranisë së dronëve me origjinë të panjohur. Këto ngjarje kanë theksuar nevojën për më shumë masa sigurie dhe kontrolle në hapësirën ajrore, duke bërë që autoritetet të jenë të kujdesshme për çdo skenar që mund të rrezikojë sigurinë e fluturimeve dhe qytetarëve.
