Forumi seksist “Phica”, i njohur për publikimin e fotove të politikaneve dhe grave të tjera me komente vulgare, tani ka një emër prapa. Sipas një hetimi nga gazetën Domani, administratori i faqes është Vittorio Vitiello, një 45-vjeçar nga Pompei që jeton në Firence. Zbulimi erdhi pas një ankese nga kryebashkiakja e Firences, Sara Funaro, e cila pa fotot e saj dhe të tjerave të postuara në këtë platformë.
Vitiello, i cili menaxhon një kompani reklamash, aktualisht po hetohet nga autoritetet italiane për akuzat e zhvatjes dhe ofrimit të shërbimeve “me pagesë”. Sipas analizës nga eksperti i inteligjencës kibernetike Alex Orlowsky, ai përdorte emra të ndryshëm si “Bossmiao” dhe “Phicamaster” për të kontaktuar viktimat dhe kërkuar pagesa për heqjen e postimeve. Çmimi për këto “paketa mbrojtjeje” varionte nga 250 deri në 1,000 euro. Përveç heqjes së përmbajtjes, ai ofronte edhe “bllokimin e temave” dhe dërgimin e provave për heqje.
Një rast konkret tregonte se ai kishte fillimisht kërkuar 700 euro për një “mbrojtje” 30-ditore, duke e krahasuar shërbimin e tij me një piceri që ofron dërgesa në shtëpi. Pas negociatave, çmimi kishte rënë në 300 euro, me mundësinë e pagesës në kriptomonedha.
Faqja “Phica.eu” u bllokua më 28 gusht, duke lënë pas përmbajtje pornografike të aksesueshme për të gjithë, përfshirë të miturit. Një mesazh në faqje thoshte se diskutimet ishin tërhequr dhe do të ishin në dispozicion për autoritetet në rast ankese. Ndërkohë, në një postim të datës 2 shtator, Vitiello mohoi akuzat, duke thënë se angazhimet që ofronte ishin “shërbime opsionale”.
Hetimet po vazhdojnë dhe pritet të thellohen në ditët në vijim, duke e bërë këtë çështje një pikë qendrore të diskutimeve mbi abuzimin online, mbrojtjen e grave dhe nevojën për filtra më të rreptë ndaj faqeve pornografike të arritshme për të miturit.
