SHBA– Arkivi Kombëtar në SHBA, si pjesë e një direktive nga Presidenti Donald Trump, ka publikuar mijëra dokumente të dixhitalizuara rishtazi që lidhen me vrasjen e Dr. Martin Luther King, Jr. në vitin 1968. Publikimi i së hënës vjen pas një urdhri ekzekutiv që Trump nënshkroi disa ditë pasi filloi mandati i tij i dytë, i cili kërkon publikimin dhe deklasifikimin e të dhënave të lidhura me vrasjen e King dhe vrasjet e ish-Presidentit John F. Kennedy dhe Robert Kennedy, tragjedi që kanë qenë objekt kurioziteti dhe teorish konspirative për dekada të tëra.
Zyra e Drejtorit të Inteligjencës Kombëtare tha në një deklaratë të hënën se publikimi përfshinte më shumë se 230,000 dosje që lidhen me vrasjen e King, duke përfshirë informacione që lidhen me burrin që u dënua për vrasjen e tij, James Earl Ray.
“Dokumentet përfshijnë detaje rreth hetimit të FBI-së për vrasjen e MLK-së, diskutim mbi pistat e mundshme, memorandume të brendshme të FBI-së që detajojnë progresin e çështjes, informacione rreth ish-shokut të qelisë së James Earl Ray, i cili deklaroi se kishte diskutuar me Ray-n një komplot të dyshuar për vrasje dhe më shumë”, thuhet në deklaratën e ODNI-së.
Familja e King iu përgjigj publikimit duke thënë se dosjet duhet të shihen “brenda kontekstit të tyre të plotë historik”, duke shtuar se udhëheqësi i ndjerë i të drejtave civile ishte “në shënjestër të pamëshirshme nga një fushatë dezinformimi dhe mbikëqyrjeje pushtuese, grabitqare dhe thellësisht shqetësuese e orkestruar nga J. Edgar Hoover përmes Byrosë Federale të Hetimit (FBI)”.
“Ndërsa mbështesim transparencën dhe llogaridhënien historike, ne kundërshtojmë çdo sulm ndaj trashëgimisë së babait tonë ose përpjekjeve për ta përdorur atë si armë për të përhapur gënjeshtra”, shkruan në një deklaratë fëmijët e King, Martin Luther King III dhe Dr. Bernice A. King.
Anëtarët e familjes së Kingut e kanë kundërshtuar prej kohësh dënimin e Ray-t , duke argumentuar se ai ishte “kurdisur”, një pikë e përsëritur në deklaratën e së hënës.
“Ndërsa shqyrtojmë këto dosje të sapo publikuara, do të vlerësojmë nëse ato ofrojnë njohuri shtesë përtej gjetjeve që familja jonë ka pranuar tashmë”, thanë ata.
