Ministri i Shtetit për Pushtetin Vendor, Arbër Mazniku, ka dhënë detaje mbi propozimet e Partisë Socialiste për Reformën e re Territoriale, që synon rishikimin e ndarjes administrative të Shqipërisë dhe funksioneve të pushtetit lokal. Sipas Maznikut, qëndra e reformës qëndron në ndarjen më të qartë të kompetencave dhe forcimin e kapaciteteve për planifikim dhe zhvillim.
Mazniku theksoi se shumë bashki të vogla përballen me mungesë specialistësh, çka e vështirëson ofrimin e shërbimeve bazë, veçanërisht në planifikimin urban. Një nga opsionet që po shqyrtohet është ndarja e vendit në rajone dhe riorganizimi i funksioneve midis niveleve të pushtetit vendor. Ai ilustroi se për të siguruar shërbime cilësore, si mirëmbajtja e rrugëve, nevojiten planifikime më të avancuara.
Mazniku theksoi se bashkitë e vogla, në mungesë të arkitektëve dhe urbanistëve, nuk janë në gjendje të realizojnë planifikimin urban efektiv. Ai gjithashtu e diskutoi sfidën e rritjes së numrit të bashkive, duke e cilësuar të pamundur nëse nuk ka qytete ose zona urbane të përshtatshme për mbështetje shërbimesh. Në këtë kontekst, riorganizimi i funksioneve mes bashkive dhe njësive administrative duket si zgjidhja e duhur.
Mazniku vuri në dukje se reforma e vitit 2014 solli zhvillime pozitive për qytetet si Korça, Gjirokastra dhe Lezha, të cilat tani kanë një fluks turistik në rritje. Ai përfundoi duke shprehur se pritet që reforma territoriale të miratohet në Parlament në korrikun e vitit 2026. Ky proces ka si objektiv krijimin e një strukturë më efikase territoriale që do të kontribuojë në zhvillimin lokal dhe përmirësimin e shërbimeve për qytetarët.
