Nesër do të jetë një ditë vendimtare për Sali Berishën. Gjykata e Posaçme Kundër Korrupsionit dhe Krimit të Organizuar nesër në orën 10:00 do të vendosë nëse ish Kryeministri Sali Berisha do të mbyllet në shtëpi me masë sigurie.
SPAK ka kërkuar arrest në shtëpi për shkak se refuzoi masën e detyrimit të paraqitjes duke mos shkuar përpara OPGJ-së. Gjyqtarja që ka në dorë fatin e Berishës është Irena Gjoka, e cila është drejtuese e Gjykatës së Shkallës së Parë. Të enjten Sali Berishës iu hoq mandati në Kuvend me 75 vota pro mes tymit dhe kaosit.
Çfarë parashikon ligji?
Sipas nenit 244 gjykata nuk mund të caktojë një masë sigurimi më të rëndë se ajo e kërkuar nga prokurori. Gjykata do të saktësojë në vendim ambientin ku Berisha do të qëndrojë, siç thuhet në kodin e procedurës penale ku ai banon, kurohet ose mbahet me asistencë. Gjykata përcakton edhe mënyrën e ekzekutimit dhe të mbikëqyrjes së saj.
Këtu parashikohen tre mundësi, e qëndrimit me byzylyk sinjalizues, Kontrolli nga policia gjyqësore dhe prokuroria në kohë të caktuara, ku verifikohet nëse i ndaluari është apo jo në banesën e përcaktuar, por edhe ruajtja në kohë të plotë me oficerë të policisë.
Po kështu do të duhet të caktohet edhe nëse Berisha do të mund të ketë kontakte me persona të tjerë jashtë familjes apo lista e emrave do të jetë e kufizuar. Ligji parashikon edhe vijimin e hetimit në gjendje të lirë kundrejt një garancie pasurore të ofruar prej tij apo personave të tjerë nëse pranohet nga gjykata.
