Një prej personave të arrestuar si i dyshuar për përfshirje në vrasjen e Liridona Murselit është Naim Murseli i cili në Kosovë njihet për angazhimin e tij si pjesë e stafit të ngushtë të kreut të Aleancës Kosova e Re, Behgjet Pacolli.
Me një shikim të shkurtër në profilin e tij në “facebook”, shihen fotografitë e shumta që Murseli ka publikuar nga jetesa luksoze që ka bërë, në Suedi, por edhe në udhëtime të ndryshme bashkë me Pacollin.
Të shumta janë edhe fotografitë e tij me gruan, Liridonën, e cila është varrosur sot në fshatin e saj të lindjes në Gjakovë.
Sipas të dhënave që janë të disponueshme në internet, Murseli e ka kryer edhe shkollën e mesme në Gjimnazin “Agnebergs” në qytetin Uddevalla nga viti 2006 deri në vitin 2009 në Suedi, megjithatë nuk dihet se në çfarë drejtimi.
Pas kësaj, Murseli ka regjistruar Shkollën për Biznes në vitin 2010 për të diplomuar më pas. Nga viti 2011, ai ka punuar në Suedi si shitës dhe agjent i shitjes në kompani të ndyrshme suedeze.
Ai gjithashtu figuron si themelues i një kompani mediale dhe se është marrë edhe me marketing në Suedi.
“Jemi të shokuar nga lajmi për vrasjen e rëndë të një nëne të re. Na inkurajon fakti që reagimi profesional dhe efikas i policisë ka qenë i menjëhershëm. Murseli ka qenë një djalë i ri është bërë pjesë e stafit të gjerë të z.Pacolli, por që zyrtarisht nuk ka qenë këshilltar i tij. E vërteta është se ka qenë asistent për rrjetet sociale për shkak të njohurive të IT që ka pasur dhe i është dhënë mundësia nga ish-presidenti Pacolli,” ka thënë ndër të tjera sot këshilltari kryesor i Pacollit, Jetlir Zyberaj për Gazetën Express./Gazeta Express
