Nga 11 urdhër arreste që lëshoi SPAK-u për disa vepra penale, tre persona u arrestuan, një u la në detyrim paraqitje dhe shtatë të tjerë janë në kërkim. Mes të arrestuarve është edhe Bujar Ajeti i njohur edhe me mbiemrin Gërmizi. Ai është nga Kukësi.
Por kush është Bujar Gërmizi?
Bujar Gërmizi rezulton person me disa precedentë penalë. Në 1999 ai ka qenë i dyshuar për grabitjen e bankës së kursimeve në Kukës. Në atë kohë ai ishte oficer policie.
Ngjarja ka ndodhur në Dhjetor të vitit 1999. Ai ishte përgjegjës i sigurisë për transportin e lekëve por i grabiti bashkë me dy të tjerë. Gjatë aksionit dy personat që ishin bashkë me Gërmizin në grabitje u vranë. Një nga viktimat ishte kunati i tij.
Vetëm Bujar Gërmizi u plagos por arriti që të shpëtonte duke kaluar kufirin për në Kosovë. Aty u arrestua dhe pas disa vitesh u ekstradua në Shqipëri.
Në 2009 ka qenë i dyshuar për trafik armësh dhe në Maqedoninë e Veriut është arrestuar për trafik droge. Ai është arratisur nga burgu në Maqedoni dhe kishte humbur gjurmët.
