Gjykata e Posaçme e Apelit për Korrupsionin dhe Krimin e Organizuar la në fuqi dënimin me burgim të përjetshëm të Ardian Çapjas për një vrasje të dyfishtë të ndodhur në vitin 2012 si dhe grup të strukturar kriminal.
Me burgim të përjetshëm u dënuan edhe Florenc Çapja dhe Jorgo Leku (alias Olsi Leka), ndërsa Klajdi Dokoli dhe Etjen Cani u dënuan me 25 vjet burg dhe Ervis Bardhi me 15 vjet heqje lirie.
Çapja dhe të pandehurit e tjerë u shpallën fajtorë për vrasjen e Nezir dhe Gentjan Beqirit, babë e bir, e ndodhur mëngjesin e 15 gushtit të vitit 2012 në qytetin e Elbasanit, brenda banesës së të ndjerëve.
Ardjan Çapja dhe anëtarë të familjes së tij janë pjesë e një sërë ngjarjesh të rënda që kanë ndodhur në Elbasan në 16 vitet e fundit, mes së cilave edhe disa atentate.
