Progres Raporti 2023 i KE – RTSH e kapur nga Partia Socialiste.
Presidenti i Republikës së Shqipërisë, Bajram Begaj, priti më 9 nëntor të Ngarkuarin me Punë të Delegacionit të Bashkimit Evropian në Tiranë, Zotin Luigi Soreca, i cili i dorëzoi Raportin e Progresit për vitin 2023 të Komisionit Evropian për Shqipërinë.
Në raport theksohet se Liria e Shprehjes ka një përparim të kufizuar. Ndërsa për transmetuesin e shërbimit publik RTSH, Komisioni Evropian e vlerëson shumë shqetësuese zgjedhjen e Alfred Pezës në krye të RTSH-së.
Në mars 2022, Parlamenti nisi zyrtarisht procesin për plotësimin e dy vendeve vakante në Këshillin Drejtues të RTSH-së ( transmetuesit publik), i cili përbëhet nga 11 anëtarë. Një vend i lirë akoma i pa plotësuar. KE thekson se parlamenti duhet të shmangë bllokimet dhe vonesat në procedurën për emërimin e anëtarëve të Këshillit Drejtues të transmetuesit publik. Emërimet duhet të kryhen në përputhje me procedurat që sigurojnë nivelin më të lartë të pavarësisë, paanshmërisë dhe legjitimitetit të institucionit.
Në qershor 2023, Këshilli Drejtues i transmetuesit publik zgjodhi me unanimitet një Drejtor të ri të Përgjithshëm. Fakti që i emëruari ka mbajtur postin e Sekretarit për marrëdhëniet me median dhe shoqërinë civile të Partisë Socialiste në pushtet deri në shtator 2021, ka ngritur disa shqetësime për pavarësinë e ardhshme të transmetuesit publik. Deri në korrik 2023, dhjetëra punonjës të RTSH-së ishin shkarkuar nga drejtori i sapoemëruar.
Këto fakte janë denoncuar për një periudhë të gjatë dhe tek timoni.al, por deri më tani nuk ka asnjë reagim as nga Këshilli Drejtues i RTSH-së dhe as nga Komisioni për Edukimin dhe Mjetet e Informimit Publik.
Dokumenti zyrtar i Këshillit të Evropës për RTSH dhe zgjedhjen e drejtorit të ri.
