Policia ka goditur dy Call Centera në Tiranë, ku mashtroheshin shtetas nga bota që të investonin në tregje fiktive. Në pranga kanë rënë tetë persona, bashkëpronarë dhe punëtorë në 2 subjektet, që dyshohet se i pastronin të ardhurat e përfituara nga mashtrimet nëpërmjet bizneseve të tyre dhe të të afërmve.
Si rezultat i operacionit “World Clock”, u ndaluan shtetasit: Eni Sula, Emiljano Paja, Mario Sota, Erjon Hoxha, Alma Haruni, Saimir Brakaj, Fjoralba Hoxha dhe Erjona Murrizi.
Nga hetimet rezultoi se këta shtetas, nëpërmjet 2 subjekteve ekonomike, të paregjistruara, në kryeqytet mashtronin shtetas nga disa kontinente, kryesisht gjatë orëve të natës, që të investonin shuma të konsiderueshme parash në tregje fiktive.
Nga kontrollet, në të dyja call centerat u gjetën 75 punonjës të paregjistruar, si dhe u sekuestruan në cilësinë e provës materiale 13 500 euro, një automjet luksoz, prodhim i viteve të fundit, 75 laptopë, 25 kompjuterë, 35 celularë, 2 servera, 2 DVR dhe disa blloqe shënimesh, me emrat e shtetasve të mashtruar.
