Përveç perandorisë televizive, ekipit të Monzës dhe kompanive të sigurimeve, Silvio Berlusconi kishte një tjetër “pronë”. Bëhet fjalë për më shumë se njëzet e pesë mijë piktura që “Cavaliere” kishte blerë vitet e fundit, kryesisht nga kanalet televizive lokale me shfaqje ku shiten vepra arti ose nga tregtarë.
Sipas gazetës La Repubblica dhe kritikut dhe politikanit tekno Vittorio Sgarbi, “pjesë që mund të jetë me interes janë gjashtë ose shtatë, jo më shumë”. Pjesa tjetër në thelb nuk kanë asnjë vlerë të veçantë. Por çështja, sipas gazetës, është se për ruajtjen e këtyre “veprave”, Berlusconi kishte marrë me qira një magazinë të madhe pranë vilës së tij jashtë Milanos, për 800 mijë euro në vit.
Katër fëmijët e tij thuhet se janë të vendosur të mos paguajnë shumën specifike pasi disa vepra, sipas informacioneve, tashmë janë dëmtuar nga agjentë të ndryshëm. “Sipas dëshmive, nga zona ku ndodhet magazina, së fundmi është ngritur në qiell një re tymi. Familja Berlusconi, megjithatë, as konfirmon dhe as mohon se pikturat mund të jenë djegur”,shkruan La Repubblica.
Mbetet për t’u parë se çfarë do të bëhet me këtë magazinë prej 4500 metrash katrorë, nëse fëmijët e ish-kryeministrit dhe biznesmenit italian (i cili u nda nga jeta qershorin e kaluar) do të vendosin të ruajnë të paktën disa nga punimet në këtë “koleksion” të veçantë dhe nëse pjesa tjetër do të shkatërrohet apo edhe do të dhurohet.
