Pas akuzave të SPAK kundër ish-kryeministrit Sali Berisha dhe dhëndrit të tij në lidhje me aferën e ish-kompleksit Partizani ka ardhur edhe reagimi i Lulzim Bashës.
Ai ka bërë një reagim ndonëse jo në mënyrë të drejtpërdrejtë duket se mbështet akuzat e Prokurorisë ndërsa kërkon që t’i jepet fund pandëshkueshmërisë.
“Të korruptuarit duhet të japin llogari para drejtësisë e paratë që u kanë marrë shqiptarëve t’u kthehen mbrapsht.”, shkruan Basha në një postim në Facebook, pas një takimi me qytetarë në Dibër.
SPAK arrestoi mbrëmjen e djeshme dhëndrin e Berishës, Jambarbër Malltezi dhe lëshoi masën detyrim paraqitje për ndërtuesin Fatmir Bektashi.
Edhe për Berishën u dha masa “detyrim paraqitje” si dhe i është bllokuar pasaporta për të mos udhëtuar jashtë vendit.
Si Berisha, Malltezi edhe Bektashi akuzohen për korrupsion, pastrim parash dhe pastrim të produkteve të veprës penale.
