Mesditën e sotme janë mbledhur për herë të katërt deputetët e opozitës. Dy grupet, Sali Berishës dhe Gazment Bardhit. Pjesa që ka refuzuar bashkimin është e Lulzim Bashës, i cili ka pas tij vetëm 10 deputetë. Kryetari i grupit të PD-së, Gazment Bardhi fillimisht denoncoi se grupet kriminale janë përfshirë në portin e Durrësit.
“Kjo është rutinë e grupit tonë parlamentar. Është e papranueshme t’i mohosh opozitës ngritjen e komisioneve parlamentare. Edi Rama po bën përpjekje për të shpëtuar grupin kriminal duke mos ofruar shërbimet e duhura shëndetësore.
Grupe kriminale janë të përfshirë në projektin e portit të Durrësit. Ekspertët po vlerësojnë mundësinë për ta dërguar ligjin në Kushtetuese dhe së dyti për të ndjekur të gjitha rrugët për të çuar përpara drejtësisë ata që po tentojnë që të pastrojnë paratë e krimit” tha ai.
Më pas kaloi te opozita duke sulmuar hapur Lulzim Bashën. “Vettingu në politikë apo Presidenti nga populli nuk ka të bëjë me reformën zgjedhore. Kolegu Basha të vijë dhe të bëjë betejë në Kuvend dhe të mos vijë vetëm për të votuar.
Paguhet për të ardhur për të bërë opozitë në Kuvend. Të vijë që këtë të enjte për të bërë betejë në Kuvend për dy komisionet që kemi kërkuar. Bashës i është vënë punonjës garde për ta ruajtur edhe pse nuk ka asnjë status” tha ai.
Gazetarët e pyetën se Berisha i frikësohet një skenari që shumica socialiste do të njohë Flutura Açkën në krye të grupit të PD-së, por Bardhi u shpreh se “nuk besoj se zoti Berisha ka shprehur ndonjë frikë, por ka shprehur një shqetësim pasi ka një tentativë të mazhorancës për t’ju imponuar opozitës në parlament. Ka mbi një muaj që mban të hapur një temë të mbyllur. Deputetët e kanë shprehur qartë vullnetin e tyre” tha ai.
