Ky është momenti i shpërthimit, i cili u cilësua si sulm terrorist, mëngjesin e sotëm në Ankara.
Në video shihet se njëri nga terroristët zbret nga makina dhe hedh veten në erë.
Ngjarja ka ndodhur para portës së Drejtorisë të Përgjithshme të Sigurisë të Ministrisë të Punëve të Brendshme.
Nga sulmi mbetën të plagosur dy policë, ndërsa terroristi tjetër, i cili ndodhej në makinë, u neutralizua, sipas autoriteteve vendase.
Konkretisht, ministri i Brendshëm, Ali Gerlikaya, në një deklaratë në llogarinë e tij në rrjetet sociale thotë: “Rreth orës 09:30, 2 terroristë kanë drejtuar një mjet komercial para portës së hyrjes së Drejtorisë së Përgjithshme të Sigurisë së Ministrisë të Brendshme duke kryer një sulm me bombë. Njëri nga terroristët i vuri flakën vetes dhe terroristi tjetër u neutralizua.
Gjatë të shtënave mbetën të plagosur lehtë 2 efektivë të policisë sonë. I uroj heronjve tanë shërim të shpejtë.
Lufta jonë do të vazhdojë e pandërprerë derisa terroristi i fundit të neutralizohet”, tha ai.
Në vendngjarje kanë shkuar disa automjete policie dhe autoambulanca. Pas panikut, qarkullimi në disa rrugë është ndërprerë dhe dëgjohen zhurmat e autoambulancave që po vërshonin drejt zonës.
Sipas CNN TURK, shpërthimi ndodhi në një automjet komercial gri. Mësohet gjithashtu se pas shpërthimit janë dëgjuar të shtëna armësh.
