Alfred Peza është i trembur dhe kjo ndjehet ngado që ai shkon. Kush ka qenë pranë tij këto ditë, e ka konstatuar menjëherë. Këshilli Drejtues, i cili në datën 13 Qershor 2023 e votoi unanimisht në detyrën e Drejtorit të Përgjithshëm të RTSH, është kthyer në makthin e tij më të madh, është shndrruar në pengesën e tij të madhe dhe të pakalueshme.
Këshilli Drejtues e ka kuptuar tashmë se kush është Alfred Peza, e ka kuptuar shumë mirë strategjinë e tij të rënimit dhe të shkatërrimit të RTSH dhe i ka thënë “NDAL!”. Këshilli Drejtues e ka zbuluar Alfred Pezën dhe e ka çarmatosur nga çdo “armë krahu e brezi”.
Alfred Peza është i frikësuar dhe frika i lexohet në sy. Kryetari i Këshillit Drejtues, Leka Bungo, i’a ka rreshtuar dhe numëruar të gjitha shkeljet ligjore, që ai dhe çeta e tij mercenare ka kryer në RTSH. Në të gjitha mbledhjet e zhvilluara nga Këshilli Drejtues, pas datës 11 Shtator 2023, Alfred Peza e ka parë dhe kuptuar se tanimë i ka humbur të nëntë votat e tij, ndaj dhe Alfred Peza nuk është i qetë, ai është i tmerruar. Qendresa e vazhdueshme dhe e pakompromis e Këshillit Drejtues, Alfred Pezën e lebetit.
Alfred Peza është kapur në flagrancë. Alfred Peza ia ka hequr ligjshmërinë veprimtarisë së RTSH. Shkeljet e tij ligjore, janë të vazhdueshme. Këshilli Drejtues e ka denoncuar Alfred Pezën se po drejton veprimtarinë e RTSH në kundërshtim me kërkesat e Ligjit nr. 97/2013 “Për mediat audiovizive në Republikën e Shqipërisë”, të Statutit të RTSH dhe të rregulloreve të miratuara nga Këshilli Drejtues i RTSH. Alfred Peza ka shkelur dispozitat e Kodit të Punës, Kodit të Procedurave Administrative, Ligjin nr. 97/2013 “Për mediat audiovizive në Republikën e Shqipërisë”, Statutin e RTSH, rregulloret e miratuara nga Këshilli Drejtues i RTSH.
Alfred Peza është gënjeshtar. Alfred Peza gënjeu hapur anëtarët e Këshillit Drejtues, kur deklaroi para tyre se nuk do të hiqte asnjë punonjës të RTSH nga puna, nëse zgjidhej Drejtor i Përgjithshëm i RTSH. Alfred Peza hoqi dhunshëm nga puna mbi 100 punonjës të RTSH në 100 ditët e para të ushtrimit të detyrës. Alfred Peza gënjeu hapur anëtarët e Këshillit Drejtues, kur deklaroi para tyre se do ta bënte RTSH sërisht të madhe në epokën digjitale. RTSH po bëhet gjithnjë e më e vogël.
Alfred Peza përsëri gënjeu hapur anëtarët e Këshillit Drejtues, ku deklaroi para tyre tre kolonat kryesore mbi të cilat do të ngrihej puna për arritjen e ambicies për ta rikthyer RTSH sërisht të madhe në epokën digjitale. Sot pas 100 ditëve në detyrën e drejtorit të përgjithshëm të RTSH, ato kolona janë rënuar tërësisht.
Por, Alfred Peza është dhe pengmarrës. Po po, pengmarrës. Alfred Peza ka që nga data 11 Shtator 2023 që marrë peng vendimin e Këshillit Drejtues për ngritjen e komisionit për shqyrtimin dhe vlerësimin e ndërprerjeve të marrëdhënieve të punës të punonjësve me RTSH, si dhe rikthimin në punë të të gjithë punonjësve, kontratat e punës të të cilëve, janë zgjidhur në mënyrë të paligjshme.
Ai nuk lejon që ky vendim të shkruhet nga asistentja e Këshillit Drejtues dhe t’u jepet për nënshkrim anëtarëve të tij. Alfred Peza e di shumë mirë që nëse ky vendim nënshkruhet dhe publikohet, telashet do t’i ketë shumë të mëdha. Ai është një vendim shumë i vlefshëm edhe për punonjësit e RTSH. Është hera e parë, që një këshill drejtues i RTSH mbështet punonjësit e RTSH.
Kjo që po ndodh me këtë këshill, nuk ka ndodhur kurrë më parë në RTSH. Këshilli Drejtues është shndrruar në mburojën e vetme të punonjësve të RTSH, kundër Alfred Pezës. Me mos publikimin e vendimit të Këshillit Drejtues, Alfred Peza kërkon që të mbrohet nga Këshilli Drejtues. Me mos publikimin e vendimit të Këshillit Drejtues, Alfred Peza kërkon të mbrohet nga punonjësit dhe ish – punonjësit e RTSH, si dhe të dëmtojë Këshillin Drejtues.
Alfred Peza duhet ta dijë se RTSH nuk është çifligu i tij. Alfred Peza duhet ta dijë se punonjësit e RTSH nuk janë bujkrobër. Alfred Peza duhet ta dijë se përpara RTSH ai apo 100 të tjerë si ai, janë zero.
Së fundi, burimet tona në RTSH, na informojnë se këto ditë Alfred Peza i alarmuar është përpjekur të komunikojë përmes telefonit me disa anëtarë të Këshillit Drejtues, por këta nuk ia kanë hapur telefonin. Tanimë, është e qartë se Alfred Pezës i është sosur uji i gamiles.
