Policia e Tiranës ka arritur të gjejë dhe shoqërojë shtetasin Eldi Allushi, i cili mëngjesin e sotëm, pasi u përfshi në një aksident automobilistik te diga e liqenit artificial në kryeqytet, braktisi automjetin dhe u arratis nga vendngjarja. Përmes një postimi në Facebook, Policia e Tiranës ka ndarë pamjet nga momenti i arrestimit të të riut.
Kujtojmë se aksidenti ka ndodhur rreth orës 05:00 të mëngjesit, ku i riu me mjet tip “BMW X6”, duke ecur me shpejtësi të lartë, ka humbur kontrollin e mjetit dhe është futur tek diga e liqenit artificial, duke u përplasur me murin rrethues.
Mjeti është përplasur në një zonë të autorizuar vetëm për këmbësorët, ndërkohë që pronari i tij do t’i nënshtrohet verifikimeve dhe hetimeve të mëtejshme mbi rastin.
Reagimi i Policisë:
Policia Rrugore Tiranë-Rreth orës 15:00 të ditës së sotme, Policia e Qarkullimit Rrugor Tiranë ka arritur të lokalizojë dhe shoqërojë në komisariat shtetasin E. A., pronar i automjetit BMW X6, i cili mëngjesin e sotëm, rreth orës 05:15, është përplasur në bordurën mbrojtëse në skarpatin e digës së Liqenit Artificial. Pronari i mjetit do t’i nënshtrohet verifikimeve dhe hetimeve të mëtejshme mbi rastin.