Të tjera detaje janë zbardhur nga krimi i rëndë që tronditi qytetin e Vlorës mesditën e kësaj të hënë, ku mbeti i vdekur një 55-vjeçar.
Autori i dhunimit për vdekje të 55-vjeçarit në Vlorë, Rei Meta, rezulton të jetë djali i anëtares së Këshillit të Lartë të Prokurorisë, Nurihan Metës.
Mësohet se, Rei ishte futur sekser për një pronë në qytetin e Vlorës, por që nuk arriti të mbarojë dot punë.
Kjo për arsyen se ndërtuesi e kishte zgjidhur me palë të treta, mirëpo kjo duket se nuk i ka pëlqyer të riut, i cili pretendonte që për punën e kryer të shpërblehej nga ndërtuesi me një apartament.
Por, viktima nuk pranoi t’ia jepte apartamentin për ta vendosur në emër të tij, një konflikt ky, që kishte nisur që prej 7-8 muajsh, e që sot degradoi në dhunë fizike, e deri në vrasje.
Po ashtu, mësohet se Rei Meta futej nëpër punë të tilla ndërmjetësimi dhe premtonte zgjidhje situatash në emër të së ëmës, anëtarë e KLP-së.
Kujtojmë se ngjarja ndodhi pas një konflikti mes autorit dhe viktimës, në një qendër interneti. Si pasojë e goditjes me grushte, 55-vjeçari ka ndërruar jetë.
Ndërkohë pak orë pas ngjarjes, është venë në pranga Rei Meta. Ngjarja ndodhi pranë Gjykatës së Shkallës së Parë në Vlorë, rreth orës 11:45, në lagjen “Hajro Çakërri”.
