Ish-kryeministri Sali Berisha ka vendosur të mbledhë Këshillin Kombëtar të “Rithemelimit”, ditën e premte në orën 19:00.
Sipas njoftimit nga PD-ja e “Foltores”, Këshilli Kombëtar do të miratojë dokumentet për analizën e brendshme, të cilën e paralajmëroi sot Berisha.
“Kryesia e PD merr vendim për nisjen e analizës së brendshme dhe thirrjen e Këshillit Kombëtar.
Partia Demokratike në mbledhjen e Kryesisë vendosi fillimin e procesit të analizës së saj të brendshme, ku u miratuan drejtimet dhe modalitetet që do të ndiqen.
Kryesia mori vendim gjithashtu të thërrasë ditën e premte në orën 19.00 mbledhjen e Këshillit Kombëtar për miratimin e dokumenteve përkatëse”, thuhet në njoftim.
Analiza mesa duket ndodh pas raportit të “Rithemelimit” për zgjedhjet vendore të 14 majit, që sipas Berishës janë dokumentuar me mbi 6000 faqe shkeljet.
