Për dikë që nuk e njeh mirë gjeografinë e qytetit të Vlorës, këto pamje mund t’i sjellin në vëmendje luftën mes Ukrainës dhe Rusisë.
Por nuk bëhet fjalë për ndonjë sulm me raketa “Himars”, as për ndonjë shpërthim të fuqishëm në depot e armatimeve ruse. Prej ditës së djeshme ka marrë flakë mali gjigant i plehrave në qytetin turistik të Vlorës.
E ndërsa në orët e mbrëmjes të kësaj të diele, situata nuk duket aspak e mirë. Zjarri raportohet se është përhapur edhe më tej, duke përffshirë sipërfaqe të mëdha të mbetjeve në vendgrumbullim.
Një shtullungë e madhe tymi kancerogjen dhe me erë të rëndë ka mbuluar një pjesë të madhe të qytetit bregdetar, me siguri dallohet që nga brigjet e Italisë fqinje.
Zjarrfikësit e kanë të pamundur të vënë nën kontroll flakët. Ndërhyrja nga ajri deri tani nuk po vjen.
