Ish-zv/kryeministri Arben Ahmetaj nga Britania, ku ndodhet sipas avokatit, ka reaguar për herë të parë pas nisjes së kontrolleve në banesat e tij, partneres, ish-gruas, por edhe familjarëve.
Deputeti socialist i cilëson kontrollet reprezalje që po i bëhet. Ai thotë se të moshuarve u janë marrë telefonat në kërkim të provave për “inceneratorët”.
“Sot u bë raprezalja e rradhës në familjen time, nga mosha 82 vjeç e poshtë. Madje pleqve iu janë marrë dhe celularët, në kërkim të provave për “inceneratorët” shprehet ai përmes rrjeteve sociale.
Arben Ahmetaj mohon lajmin që publikoi gazetari Poli Hoxha, i cili deklaroi se partnerja e ish-zv/ kryeministrit transferoi 1.8 milionë euro në Zvicër.
“Ndërsa “spin doctor”/kontakt inceneratorësh, ka qarkulluar lajmin e rremë se qenkan transferuar 1,8 milionë euro…”.
Në fund ka edhe thirrje. “Në vend të merren me fondet e inceneratorëve, merren me 1,8 milione euro imagjinarë. Fake news e prodhuar në laboratorët e ortakërisë mediatike dhe jo vetëm, të inceneratorëve ….” mbyllet reagimi i tij.
