Britania e Madhe i ka kthyer përgjigje ish-kryeministrit Sali Berisha, për shpalljen e tij si person “i padëshiruar”.
Dokumenti është publikuar nga mediat pranë Berishës, ndërsa vetë ky i fundit në një konferencë të posaçme ka shpjeguar atë që e ka quajtur komplot ndaj tij.
Referuar dokumentet në gjuhën angleze, Britania e Madhe i thotë Sali Berishës që të mos përpiqet të udhëtojë drejt ishullit pasi nuk do të lejohet në zbatim të urdhrit të autoriteteve të atjeshme.
“Qëllimi i kësaj letre është t’ju informojë se më 19 korrik 2022, pas shqyrtimit më të kujdesshëm, Sekretari i Brendshëm urdhëroi personalisht që ju të përjashtoheni nga Mbretëria e Bashkuar për arsye kriminaliteti dhe korrupsioni mbi bazën se prania juaj në Britania e Madhe nuk konsiderohet e favorshme për të mirën publike si rezultat i vlerësimit se ju keni lidhje të qarta me grupet e krimit të organizuar dhe kriminelët që kanë paraqitur një kërcënim për sigurinë publike në Shqipëri dhe në MB dhe se jeni të gatshëm t’i përdorni këto lidhje për më tej ambiciet tuaja politike dhe vlerësimin se keni përdorur pozitat tuaja të zgjedhura për t’u përfshirë në korrupsion dhe sjellje kriminale për të pasuruar veten dhe rrethin tuaj të ngushtë, në veçanti ish-këshilltarin tuaj zgjedhor Damir Fazlliç, të cilin më pas e mbrojtët kur u shfaqën prova të kriminalitetit”, thotë letra.
Bie në sy se Sali Berisha është njoftuar për këtë vendim dy ditë më pas, në 21 Korrik 2022.
“Vendimi u vërtetua nga Sekretari i Brendshëm sipas seksionit 2C të Aktit të Komisionit Special të Apelimit të Emigracionit të vitit 1997. Efekti i kësaj është se çdo rishikim i përjashtimit tuaj, me aplikim, mund të ndërmerret nga Komisioni Special i Apelimit të Emigracionit (SIAC)”, vijon ajo.
Përsa i përket udhëtimit në Londër, Home Office i vë në dukje ish-kryeministrit shqiptar se nuk duhet të përpiqet të udhëtojë në Britaninë e Madhe as edhe tranzit, pasi transportuesi (kompania e fluturimit) do të njoftohet për urdhrin e ndalimit ndaj tij.
“Ju nuk duhet të përpiqeni të udhëtoni në Mbretërinë e Bashkuar pasi do t’ju refuzohet hyrja. Duke qenë se jeni përjashtuar nga Mbretëria e Bashkuar nga Sekretari i Shtetit, ju jeni dikush në lidhje me të cilin një transportuesi mund t’i refuzohet autoriteti për të udhëtuar në MB sipas paragrafit 14(e) të Skemës së Autoritetit për Mbajtjen 2021¹.
Ju nuk duhet të përpiqeni të udhëtoni në Mbretërinë e Bashkuar, qoftë edhe për qëllime tranziti. Në përputhje me Aktin e Mbrojtjes së të Dhënave 2018, Home Office i trajton të gjitha informacionet personale në fshehtësi”, thuhet në dokumentin për Sali Berishën.
