Disa vatra të mëdha zjarri kanë shpërthyer në Greqi, ndërsa qindra zjarrfikës nga toka dhe ajri janë mobilizuar për vënien nën kontroll të flakëve, çka aktualisht duket si mision i pamundur.
Vatra më e rrezikshme e zjarrit konsiderohet ajo në Kuvara të Atikës, ku flakët kanë përfshirë një sipërfaqe të madhe me shkurre dhe pemë, e po përhapen me shpejtësi duke djegur edhe disa banesa.
Banorëve në zonat Saronida, Lagonisi dhe Anavysos u është bërë thirrje të evakuohen drejt Athinës.
“Po digjen banesat. Rruga është e bllokuar dhe zjarrfikësit e kanë të pamundur të kalojnë. Rrezikohen edhe fabrikat e riciklimit”, ka deklaruar për Alpha Tv, kryebashkiaku i Saroniko-s.
Aktualisht 140 zjarrfikës me 40 automjete si dhe 7 aeroplanë dhe helikopterë janë duke operuar në këtë zonë.
Më herët gjatë mëngjesit, një vatër tjetër e madhe zjarri shpërtheu në Kallithea Loutrakiou duke detyruar evakuimin e qindra banorëve. Rreth 800 kampera u urdhëruan të lënë zonën dhe të gjejnë strehë brenda një stadiumi sportiv.
