Prej së premtes pasdite ende nuk ka asnjë reagim nga drejtësia për dosjen e Arben Ahmetajt. Kuvendi i dha lejen prokurorisë që të arrestonte ish-zv/kryeministrin. Vendimi i 120 deputetëve (117 pro dhe 3 kundër) u dorëzua në tryezën e Altin Dumanit pasditen e së premtes.
Prokuroria e Posaçme iu drejtua gjykatës me kërkesën për masën e sigurisë ndaj ish-zv/kryeministrit Arben Ahmetaj rreth orës 18.00 të së premtes së 14 korrikut duke mos humbur kohë.
Gjyqtari i gatshëm Erion Bani, mori në dorë kërkesën e SPAK për deputetin socialist që akuzohet për korrupsion pasiv në 6 raste, shpërdorim detyre dhe pastrim parash.
Paraprakisht në media u raportua se në kërkesën e prokurorisë për masën e sigurisë për Ahmetajn janë përfshirë edhe persona të tjerë. Prej së premtes kur mori në dorë kërkesën gjyqtari Bani kishte 48 orë kohë të vendoste.
Koha ka përfunduar të dielën nëse llogaritet që zarfi me dosjen brenda është protokolluar të premten. Por sot ende nuk ka asnjë lëvizje. Nëse shkalla e parë ka refuzuar kërkesën për ta firmosur urdhrin për arrestimin dhe kontrollin e banesës së Ahmeajt, SPAK mund t’i drejtohet apelit.
Por nuk dihet nëse kemi të bëjmë me këtë fakt në këto momente. Para votimit, Ahmetaj publikoi në rrjetet sociale një mesazh të gjatë ku theksoi se do të luftojë për të vërtetën.
Por, kryeministri Rama tha se hetimi i SPAK ka qenë i plotë dhe se tashmë çështja është në duart e gjykatës. Imuniteti u hoq, kërkesa u dorëzua, por çfarë po ndodh në gjykatë?
