Jashar Maja ishte një nga personat që u dhunua barbarisht nga anëtarë të fisit Rraja në një lokal në Krujë. Mësohet se vëllai i tij Lulzim Maja ka marrë mesazhe kërcënuese në rrjetin social Facebook të hënën e 10 korrikut.
“Report Tv” bën me dije se personi që ende nuk është identifikuar nga policia i ka përmendur plumbat dhe drurin 43-vjeçarit dhe e ka kërcënuar duke i thënë se “do e shihte se çfarë do t’i bënte kur ta takonte nga afër”.
Të gjitha mesazhet kërcënuese janë administruar nga policia dhe Lulzim Maja është pritur nga vetë drejtori i Policisë së Tiranës, Tonin Vocaj, i cili e ka garantuar se blutë do të identifikojnë sa më parë të jetë e mundur autorin e këtyre mesazheve. Por, këto nuk janë mesazhet e para kërcënuese ndaj Majës, pasi mesazhe të ngjashme ka marrë në rrjetin social TikTok edhe para aktit barbar të dhunës ndaj Jashar e Bilbil Majës, por në atë kohë nuk u ka kushtuar rëndësi.
Të gjitha kërcënimet, në Facebook dhe TikTok janë administruar nga policia dhe po hetohen për veprat penale “Kanosja” dhe Përdorimi me keqdashje i thirrjeve telefonike”, materiale që janë referuar edhe në Prokurorinë e Tiranës. Nuk dihet në se pas tyre fshihet ndonjë familjarë i Rrajave, teksa këtë pritet ta qartësojnë hetimet.
