Ish-kryedemokrati Lulzim Basha i cili kandidon për tu rikthyer sërish në krye të Partisë Demokratike, ka përshëndetur vendimin e SPAK, i cili këtë të hënë i është drejtuar me kërkesë zyrtare Kuvendit të Shqipërisë, për të kërkuar lejimin e arrestimit të deputetit socialist Arben Ahmetaj.
Basha thotë se PD-ja e drejtuar prej tij ka bërë një betejë të gjatë për aferën e inceneratorëve, duke përshëndetur kërkesën e Prokurorisë së Posaçme, por thekson se prokurorët nuk duhet të ndalen me kaq.
“Nuk ka rrugë tjetër për Shqipërinë dhe shqiptarët përveç asaj që dikton pastrimi i politikës nga të gjithë ata që kanë shpërdoruar besimin e qytetarëve, duke i shërbyer interesave korruptive dhe klienteliste. Kërkesa e SPAK për arrestimin e Arben Ahmetaj, pas një beteje të gjatë të Partisë Demokratike për aferën e inceneratorëve, duhet përshëndetur por nuk mund të ndalet me kaq.
Drejtësia duhet të shkojë deri në fund, sepse askush nuk mund të jetë mbi ligjin! Sot është më jetik se kurrë vetting-u i politikanëve, verifikimi i pasurive dhe lidhjeve të tyre me krimin që mbajnë peng Shqipërinë, dhe godasin sigurinë dhe mirëqenien e familjeve shqiptare”, shkruan Lulzim Basha.
Pas këtij reagimi të Bashës ka reaguar gazetari Habjon Hasani i cili me anë të një statusi në ‘facebook’, shkruan se: I sugjeroj miqësisht zotit Luli të mos prononcohet shume deri në arrestimin e Ahmetajt, se ndoshta i ka ende të ruajtura në telefon SMS-të, Ahmetaj me delfinët e Lulit.
“Lulzim Basha paska reaguar gjithe entuziazem ne lidhje me kerkesen per arrestimin e Ahmetaj. I sugjeroj miqesisht zotit Luli te mos prononcohet shume deri ne arrestimin e Ahmetajt, se ndoshta i ka ende te ruajtura ne telefon SMS-te Ahmetaj me delfinet e Lulit apo dhe me biznesmenet dikur te preferuar te tij, shkruan gazetari.
