24 orët e kaosit në Rusi nga rebelimi i Evgjeni Prigozhin dhe 25 mijë mercenarëve të Vagner që ai drejton mund të jetë një inskenim i Vladimir Putinit.
Ekspertë ndërkombëtarë dhe njohës të shërbimeve sekrete ruse ngrenë dyshimet se si FSB, pasuesja e KGB nuk u vu më herët në dijeni mbi të gjitha zhvillimet që tronditën Rusinë mesnatën e së premtes dhe përgjatë të shtunës.
Ata thonë se mënyra se si u tërhoq grupi Vagner nga objektivi për të rrëzuar komandën ushtarake ruse ngre hije të forta dyshimi se gjithçka ishte e stisur dhe një sajesë, pas të cilës përfiton Vladimir Putin.
Ekspertët thonë se pas kësaj ngjarjeje, Vladimir Putin ka pretekstin dhe duart e lira që të shkarkojë të gjithë zinxhirin komandues ushtarak, duke nisur nga ministri i tij i Mbrojtjes, Sergei Shoigu dhe ta bëjë këtë me pak kosto në imazhin e tij mes qytetarëve.
Së dyti, sipas mediave ruse Evgjeni Prigozhin dhe Vagner do të strehohen në Bjellorusi, ndërsa grupi vijon me fushatën e rekrutimeve në Telegram, që do të thotë se nuk do të shpërbëhet.
Zhvendosja në Bjellorusi mund të jetë një taktikë nga ku Putin t’i urdhërojë mercenarët e vet në një përpjekje të dytë për të marrë Kievin, ose të paktën t’i hapë dy fronte Ukrainës, që do ta detyronte këtë të fundit të dobësonte radhët në kundërsulmin e nisur në Donbas dhe Krime, në lindje të vendit./Topnews
