Janë zbardhur detaje të reja nga operacioni i sotëm i SPAK, ku lëshoi 15 urdhër-arreste ndaj një grupi kriminal që transportonte nga Franca në Shqipëri, bizhuteri të vjedhura dhe këtë gjë e ka bërë në dhjetëra raste të dokumentuara.
Burime bëjnë me dije se bizhuteritë e grabitura në Francë, kryesisht flori, shiteshin tek argjendaria “Kashara” në Tiranë dhe mësohet se pronari i saj, Vangjush Kasharaështë vënë në pranga.
Po ashtu mësohet se bizhuteritë transportoheshin me autobusët e agjencisë së udhëtimit “Erdisa Tours” dhe në pranga ka rënë administratori i saj, Agustin Mesuli nga qyteti i Lezhës.
Në pranga mësohet se janë vënë gjithashtu dhe shtetasit Altin Doda, Florjan Bakri dhe Tomor Baruti. Po ashtu janë arrestuar edhe zyrtarë të Policisë Kufitare në Durrës, Lezhë dhe Hani i Hotit.
Hetimi i SPAK nisi pas një letër-porosie të autoriteteve franceze. Sa i përket akuzave të ngritura nga SPAK, bëhet fjalë për disa vepra penale, konkretisht; “Pastrimi i produkteve të veprës penale ose veprimtarisë kriminale”, kryer në formën e veçantë të bashkëpunimit, atë të grupit të strukturuar kriminal, “Ushtrimi pa licencë i veprimtarisë bankare”, kryer në formën e veçantë të bashkëpunimit, atë të grupit të strukturuar kriminal., “Kontrabanda me mallra të tjerë, kryer në formën e veçantë të bashkëpunimit, atë të grupit të strukturuar kriminal; “Mosdeklarimi në kufi i të hollave dhe i sendeve me vlerë”; “Grup i strukturuar kriminal” dhe “Kryerje e veprave penale nga organizata kriminale ose grupi i strukturuar kriminal”.
