Mediumi serb, Novosti, i afërt me regjimin e Vuçiqit raporton se tre policë të Kosovës janë arrestuar nga Policia e Serbisë sot.
“Anëtarë të njësive speciale të Policisë së Serbisë kanë arrestuar në territorin e Serbisë, tre ushtarë të armatosur deri në dhëmbë të shtetit të rremë të Kosovës,” – shkruan Novosti.
Për një gjë të tillë ka raportuar edhe B92.
Nacionale ka provuar ta konfirmojë apo demantojë këtë informacion, por deri në këtë moment nga Policia e Kosovës kanë qenë të paqasshëm.
Sipas Novostit, Vuçiq është informuar në mënyrë urgjente për këtë aksion.
Mediumet kosovar ndërkohë, si Indeksonline e Veriu, kanë raportuar thjesht dyshimin se janë kidnapuar tre policë të Policisë Kufitare në territorin e Leposaviqit.
Nacionale ka mësuar se bëhet fjalë për policë kufitare, të cilët dyshohet se punonin në pikën kufitare në Jarinje. Megjithatë, edhe më tej nuk ka asnjë reagim as nga Ministria e Punëve të Brendshme e Kosovës.
Kujtojmë se dje Policia e Kosovës arrestoi një të dyshuar për veprime kriminale në veri me emrin Millun Millenkoviq Llune, për të cilin sot edhe u protestua në veri të vendit.
Ndërkohë që gjatë ditës së djeshme, policia e Serbisë i ka arrestuar edhe dy qytetarë, Dervish Maliqin dhe Esat Muçollin.
Arsyet prapa këtij arrestimi nuk diheshin.
Ndërkohë, janë publikuar edhe disa fotografi të atyre që pretendohet të jenë policët e arrestuar nga mediumi Novosti nga regjimi i Vuçiqit. Nacionale nuk ka mundur të verifikojë autenticitetin e këtyre fotografive.
Por, edhe video:
Shënim: Për çështjen ka reaguar edhe Policia e Kosovës me anë të një postimi në Facebook, ku e pranon se ka dyshime që janë kidnapuar tre zyrtarë kufitarë patrollues.
