Një biznesmen shqiptar është mashtuar nga një nigerian me emrin Sabastian Victor Negbenedor në Gjermani dhe i ka dërguar atij 25 mijë euro.
Biznesmeni me iniciale E. B. që prej 10 vitesh administron biznesin e vet në Sauk për import detergjentesh kryesisht nga shteti italian dorëzoi kallëzimin në Policinë e Tiranës në datën 20 tetor 2020. Ai përdor një adresë e-maili që komunikon me kompaninë bashkëpunuese në Bolonja të Italisë, ku pala italiane dërgonte mallin dhe biznesmeni dërgonte transfertën bankare në një prej degëve të një prej bankave të nivelit të dytë. Në datën 7 shtator atij i dërgohet një e-mail se ku duhej ta dërgonte shumën montetare, kësaj radhe jo në Itali, por në Gjermani.
Biznesmeni nuk e kuptoi se do të dërgoheshin eurot nga Italia në Gjermani dhe transferoi 25 mijë euro. Por disa kohë më pas kompania italiane e kontakton se duhej të kryente pagesën dhe në këtë situatë biznesmeni kupton se e kanë mashtruar. Në vazhdim të hetimeve paraprake iu dërguan letër porosi për ndihmë gjyqësore autoriteteve gjyqësore në Republikën e Gjermanisë dhe Republikën e Turqisë për të identifikuar IP-në me të dhënat përkatëse.
Me mbërritjen e letërporosive u identifikua se autori i mashtrimit dhe përfituesi i 25.000 eurove ishte nigeriani i lindur në ëarri, Nigeri dhe banues në Dublin të Irlandës. Në përfundim të një hetimi dy vjeçar, Prokuroria Pranë Gjykatës Shkallës së Parë të Juridiksionit të Përgjithshëm Tiranë, kërkoi masën e sigurisë ‘Arrest me burg’ për shtetasin nigerian Sebastian Negbenedor, për Veprën Penale “Mashtrimi Kompjuterik” të cilën gjykata e pranoi.
