Autoritet policore greke kanë arrestuar një 52-vjeçar shqiptar pas disa muajsh në ndjekje të tij. Ai dyshohet të jetë organizatori i një karteli të madh droge dhe ndaj tij kishte një urdhër arresti evropian si një nga personat që fitonte shuma marramendëse parash nga trafiku i lëndëve narkotike në Holandë.
Mediat fqinje raportojnë se për një periudhë 10 mujore, shuma e parave të fituara nga trafiku i drogës arrin deri në 250 milionë euro.
Identiteti i tij nuk bëhet me dije, ndërsa mediat greke shkruajnë se gjatë kontrollit të kryer në banesën e dyshuarit, janë gjetur dhe sekuestruar shuma parash në kartëmonedha nga vende të ndryshme, duke përfshirë euro, dollarë amerikanë, dollarë kanadezë, dollarë australianë, franga zvicerane, lira turke, dirhemë të Emirateve të Bashkuara Arabe dhe Rand i Afrikës së Jugut.
Ndërkohë prokuroria e Athinës në bashkëpunim me autoritetet holandeze vijon hetimet për detaje të reja pasi dyshohet se 52 vjeçari pastronte paratë e siguruara nga aktiviteti kriminal.
