Dy trafikantë droge janë arrestuar në flagrancë nga policia në Velipojë teksa kujdeseshin për serat me kanabis. Në kuadër të operacionit “Baks 1” janë vënë në pranga shtetasit Oraldo Jaku, 33 vjeç dhe Luigj Shejna, 28 vjeç, të dy banues në fshatin Baks, Velipojë.
Ata u kapën duke u kujdesur për 6 minisera ku ishin të kultivuara 270 bimë cannabis sativa.
“Këta shtetas janë kapur në flagrancë nga shërbimet e Policisë duke zbuluar nga plasmasi miniserat, të cilat gjatë natës i mbulonin me plasmas. Grupi hetimor sekuestroi në cilësinë e provës materiale një sasi të bimëve narkotike dhe prova të tjera që do ti shërbejnë hetimit, ndërsa pjesa tjetër e bimëve u asgjësua me anë të djegies.” thuhet në njoftimin e Policisë.
Më herët në kuadër të operacionit policor të koduar “Baks 1”, u vu në pranga një 19-vjeçar dhe u sekuestruan 2 armë zjarri (1 armë zjarri pistoletë dhe 1 kallashnikov) dhe municion luftarak.
Materialet procedurale i kaluan Prokurorisë për veprime të mëtejshme.
