Vetë Greqia, që u ankua për arrestimin e Fredi Belerit për blerjen e votave, nuk e fal këtë fenomen.
Një e moshuar është arrestuar në Greqi gjatë procesit zgjedhor të së dielës, pasi dyshohet se ka hedhur dy zarfe në kutinë e votimit.
Ngjarja ka ndodhur në njësinë zgjedhore 426 , në zonën e Agjia Sofjes në Patra. Sipas informacioneve të mediave greke, një i afërm i saj i kishte dhënë një fletë votimi të plotësuar.
Megjithatë, gruaja u hutua dhe hodhi në kutinë e votimit zarfin me fletën e përgatitur, si dhe zarfin që kishte marrë në qendrën e votimit për të votuar.
Me të marrë dijeni, përfaqësuesja gjyqësore thirri policinë për veprën penale të ndryshimin e rezultatit të zgjedhjeve.
E moshuara u arrestua dhe u dërgua në Komisariatin e Parë të Policisë ku i shpjegoi saktësisht se çfarë kishte ndodhur dhe më pas u la i lirë.
