Pistat janë disa, por ende nuk ka asnjë të arrestuar për vrasjen e biznesmenit Ardian Nikulaj në Lezhë. Autori ishte me maskë anticovid, skafandër dhe jelek fostorishent. U largua me një motor papaq duke ndjekur rrugën kryesore të daljes nga Shëngjini, deri në fshatin Balldren. Më pas ai është futur në një rruge dytësore ku ka humbur gjurmët pasi zona nuk ka më kamera sigurie.
Policia ka marrë në pyetje disa persona që besohet se kanë lidhje me ngjarjen kriminale, por ende nuk ka të dyshuar konkretë. Ardian Nikulaj që njihej dhe si Ardian Marku lëvizte me makinë të blinduar për shkak të hasmërive të vjetra si dhe konflikteve në biznes. Ai dispononte disa biznese, përfshirë bar-restorant “Coral”-in ku e ekzekutuan.
Nikulaj në vitin 2021 ishte kandidat për deputet nën siglën e Partisë Social-Demokrate. Prej 2019-ës ishte anëtar i Këshillit Bashkiak të Lezhës dhe rikandidonte sërish për në këshill në zgjedhjet e 14 Majit. Më herët ka mbajtur disa poste në administratën lokale si drejtor i OSHEE-së dhe ALUIZNIT.
