Gjykata e Tiranës ka caktuar ditën e sotme arrest me burg për 31-vjeçarin Armando Papa nga Fushë Kruja, pasi tre ditë më parë u kap me 62 pako me heroinë në makinën tip “Benz” me të cilën po lëvizte.
Ndryshe nga refuzimi që ka bërë para oficerëve të Policisë Gjyqësore, para togave të zeza ai ka deklaruar se po shkonte në Rinas për të dërguar një porosi motrës së tij.
Ai pretendon gjithashtu se nuk ishte në dijeni të drogës në makinën e tij, duke ngritur alibinë se ia kanë futur në makinë persona të tjerë.
Lënda narkotike ishte e fshehur në një kuti në bagazhin e makinës tip “Benz” me të cilën lëvizte i riu. Krahas 31-vjeçarit, policia shpalli në kërkim dhe bashkëpunëtorin e tij, shtetasi Roland Guzi banues në zonën e Sukthit të Durrësit, që gjithashtu dyshohet se ishte përfshirë në këtë aktivitet kriminal.
Sasia e heroinës së sekuestruar kap vlerën e mbi gjysmë milioni Euro në treg, nëse do të ishte shitur. Sipas burimeve nga policia origjina e lëndës narkotike dyshohet se ishte nga Turqia.
