KQZ ka regjistruar sot Partinë Demokratike në zgjedhjet lokale të 14 Majit. Ilirjan Celibashi i është bindur vendimit të Komisionit të Ankimeve dhe Sanksioneve që mori pak ditë më parë që rrëzoi vendimmarrjen e KQZ-së që e përjashtoi partinë më të madhe në opozitë nga procesi.
Altin Kaziaj, që përfaqëson koalicionin “Bashkë Fitojmë” të opozitës brenda së cilit Sali Berisha do të fusë kandidatët për bashkitë dhe këshillat i kërkoi Celibashit që të mos e regjistrojë PD-në, pasi vendimi do të dërgohet në Kolegj dhe se Lulzim Basha nuk firmosi deklaratën solemne.
“Përmes qokave, KAS-i vendosi në kundërshtim me ligjin” tha ai. Në krahun tjetër Indrit Sefa kërkoi zbatimin e vendimit të KAS-it për regjistrimin e PD-së. Në fund, Celibashi sikur pritej zbatoi vendimin e KAS-it për të regjistruar PD-në.
“Për cështje të tilla dhe përsa kohë ky organ ka vendosur regjistrimin e PD-së ngelet thjeshtë zbatimi i këtij vendimi. Ndaj vendosim regjistrimin, në fakt e ka vendosur KAS, të regjsitrimit të PD-së, me n/kryetar Alibeajn, në cilësinë e kryetarit të komanduar” tha ai.
