Kreu i Partisë së Lirisë Ilir Meta, ka thënë se nuk ka interes që të komentojë vendimin e KQZ për mosregjistrimin e Partisë Demokratike për zgjedhjet vendore të 14 majit. Meta u shpreh gjatë një interviste për “ABC Neës” se opozita do të triumfojë në zgjedhjet vendore.
“Nuk kam asnjë koment, sepse isha në një takim. Nuk kam asnjë interes të hyj në këto çështje, për mua është e rëndësishme, që shqiptarët më në fund do shkojnë drejt kutive të votimit. Pas 60 ditësh kthehet pluralizmi”, tha Meta.
Ai nënvizoi se me Berishën e ka firmosur një marrëveshje dhe asaj do t’i qëndrojnë deri në fund.
“Me Berishën e kemi një marrëveshje, është bërë publike. I qëndrojmë asaj marrëveshjeje. Mbështesim kandidatët e primareve. PL është e regjistruar në KQZ dhe ecën e sigurt drejt zgjedhjeve, që do mbahen pas 60 ditësh. Kemi përgatitur listat tona të këshilltareve”, u shpreh kreu i PL.
