Partia Demokratike nuk do të marrë pjesë në zgjedhjet lokale të 14 Majit. Kryetari i KQZ-së, Ilirjan Celibashi vendosi sot që të mos e miratonte kërkesën e paraqitur nga PD-ja me kryetar Lulzim Bashën për pjesëmarrjen në procesin zgjedhor. Kjo për shkak se Lulzim Basha nuk firmosi autorizimin e ri për përfaqësuesit ligjor për për zgjedhjet dhe faktin që nuk firmosi deklaratën solemne. Për këtë arsye, Celibashi nuk e regjistroi në zgjedhje. “Në kushtet kur deklarata nuk është sipas përcaktimeve unë mendoj dhe vlerësoj që kërkesa e PD-së për t’u regjistruar në zgjedhje nuk ka bazë ligjore dhe nuk duhet të pranohet. PD nuk mund të regjistrohet për zgjedhjet e 14 Majit” tha ai.
Argumenti i plotë i Ilirjan Celibashit që nuk regjistroi PD-në në zgjedhje
“Ne kërkuam një dokumentacion të plotësuar nga ana e PD-së me qëllim që të përmbushte të gjitha kushtet për t’u regjistruar. Meqë nuk ka asnjë dokument tjetër, unë mendoj që jemi në të njëjtën situatë si në të seancën e shkuar.
Dhe duke qenë se nuk kemi ndonjë tjetër shtesë, mendoj që të japim vlerësimin tonë, të komisionerit mbi kërkesën për regjistrimin e PD-së në zgjedhje. Çështja e përfaqësimit ligjor ka qenë në diskutim. Këtu nuk marr në konsideratë konfrontimin tuaj, pasi nuk është çështje e komisionerit. Por në vlerësimin ligjor.
Qëndron pretendimi i njërës palë që Basha është kryetar i PD-së sepse kështu rezulton nga gjykata, nuk ka qëndruar pretendimi tjetër që Berisha është ai kryetar i PD-së. mbi faktin e pakontestueshëm se Basha është kryetar i PD-së.
Pala që e ka paraqitur kërkesën për t’u regjistruar ka legjitimitetin e plotë. Në vlerësimin tim, zoti Basha ose personat e autorizuar prej tij kanë të gjithë legjitimitetin për të paraqitur kërkesën për t’u regjistruar. Por në vlerësimin tim duhet që ky autorizim duhet të jetë i qartë dhe i plotë, në lidhje me tagrat e të autorizuarit.
Dokumentacioni për regjistrimin e PD-së si subjekt zgjedhor i paraqitur nga ju ka një mangësi themelore, deklarata solemne, që duhet të jetë e nënshkruar nga vetë kryetari, zoti Basha, por rezulton se është nënshkruar nga zoti Alibeaj.
Në bindjen time, e bazuar në ligj, deklarata duhet të firmoset vetëm nga kryetari i partisë. Në vlerësimin tim nuk lë vend për interpretim tjetër, deklarata duket si formale, por në kuptim të përmbajtjes nuk është kështu.
Ju keni pretenduar se Basha e ka të drejtën që të firmosë edhe deklaratën solemne, por unë vlerësoj se pretendimi juaj nuk ka bazë ligjore. Në vlerësimin tim pretendimi juaj që Basha ka dhënë dorëheqjen dhe nuk mund të firmosë autorizimin bie në kundërshtim me deklaratën tuaj, pasi kur është rasti për të legjitimuar kërkesën tuaj regjistrim në zgjedhje, ju sillni si provë regjistrimin në gjykatë që kryetar është Basha, por kur ju kërkohet që përderisa Basha është kryetar dhe duhet të përmbushë detyrimet.
Mundet që deklarata të nënshkruhet nga nënkryetari kur kryetari ka dhënë dorëheqjen, ka ndërruar jetë apo arsye të tjera, por në këtë rast duhet që organet e tjera të paraqesin në gjykatës njoftimet përkatëse.
Për vetë zotin Basha nuk ka asnjë detyrim ligjor për ta formalizuar aktin e dorëheqjes, ai është i përligjur në mos interesin e tij në lidhje me administrimin e dorëheqjes së tij, por organet e tjera, si n/kryetari apo sekretari do të duhet të depozitonin në gjykatë njoftimin që kryetari, apo ish-kryetari që ju e konsideroni do të duhet të kishit depozituar në gjykatën e Tiranës.
Në kushtet kur në gjykatën e Tiranës nuk është bërë njoftimi i dorëheqjes, Alibeaj mund të pranohet që i ushtron disa kompetenca, por kurrësesi jo të gjitha kompetencat dhe përgjegjësitë e kryetarit të PD-së. Në kushtet kur deklarata nuk është sipas përcaktimeve unë mendoj dhe vlerësoj që kërkesa e PD-së për t’u regjistruar në zgjedhje nuk ka bazë ligjore dhe nuk duhet të pranohet. PD nuk mund të regjistrohet për zgjedhjet e 14 Majit.
