Botuesi i KOHA JONE, Nikoll Lesi, mendon se grupi Alibeaj po përdor makinacione për të evituar hyrjen në zgjedhjet lokale të 14 majit.
I ftuar në emisionin Të Paekspozuarit në MCN TV, Lesi tha se grupi Alibeaj nuk ka vota dhe mbështetje popullore, ndaj nëse futen në zgjedhje rrezikojnë ta rendisin logon e PD-së si parti të dhjetë!
Unë dyshoj që grupi Alibeaj, me këto lojëra dhe makinacione, që nuk shkon të marrë firmën e Lul Bashës që të regjistrohet në KQZ, pra nuk duan të shkojnë në zgjedhje. Po gjejnë manovrat e mundshme për të mos u regjistruar sepse ata e dinë rezultatin. Nuk dalin as parti e katërt, por e dhjetë… Nuk kanë fare vota. Mund t’i regjistrojë KAS ose Kolegji Zgjedhor, ku ka ndikim mazhoranca, por dëshira e tyre është të mos futen në zgjedhje sepse e dinë rezultatin- deklaroi Lesi.
Më tej Lesi, te emisioni i Ylli Rakipit, shtoi se kjo që po ndodh është e padrejtë pasi vendi ka nevojë për opozitë reale e jo si kjo që dha gjykata e apelit. Duhet të shqetsohemi të gjithë, kur nuk ka opozitë serioze dhe të përbashkuar, sepse kur kemi opozitë të fortë edhe qeverisja bëhet më e kujdesshme në raport me interesat e publikut. Por kështu siç e kanë përçarë PD-në, dhe kjo për fajin e tyre, por një dorë të fortë e ka edhe qeveria e zotit Rama, ka rrezik që mazhoranca mund të marrë shumicën dërmuese të bashkive.
Një vend normal kërkon balancim të pushtetëve, e jo si sot në Shqipëri.
