Qeveria nuk tërhiqet nga bordi i karburanteve. Sot ministrja Delina Ibrahimaj tha se do të pritet vendimi i Gjykatës Kushtetuese që e ka marrë në dorë padinë e PD-së.
“Bordi për çmimet e karburanteve është në Gjykatën Kushtetuese. Në bazë të vendimit do të vijojmë të veprojmë. Unë i qëndroj asaj që kam përsëritur, ndërhyrja e qeverisë ishte e detyruar nga kushtet që ndodheshim” tha ajo.
E pyetur nëse përpara zgjedhjeve, taksa e jashtëzakonshme që do të mblidhet nga prodhuesit e energjisë do të shpërndahet për shtresat në nevojë, si pakoja e janarit, ministrja tha se për këtë do të vendoset në fund të marsit.
“Ne kemi deklaruar se taksa e jashtëzakonshme do të mblidhet dhe shpërndahet për qëllime sociale, pensionistët apo kategoritë në nevojë. Me t’i arkëtuar do të mendojmë për skemën. Afati i arkëtimit është fundi i marsit” tha ajo.
