Ilirjan Zeqaj, autor i dy vrasjeve në Cakran në vitin 1998, është dënuar sot nga Gjykata e Fierit me 20 vite burg. 50 vjeçari akuzohet dhe është shpallur fajtor për ekzekutimin armë zjarri të dy vëllezërve Gramoz e Shkëlqim Llanaj.
Në Dhjetor 2022, prokurori i çështjes Petrit Vukaj kërkoi në pretencën e tij deklarimin fajtor dhe dënimin me 23 vite burgim ndaj Zeqaj, i cili akuzohej për “Vrasje me paramendim” kryer në bashkëpunim dhe “Mbajtje pa lejë të armëve të zjarrit”. Sot gjykata ka dhënë dënimin me 20 vite burg.
Avokatët e Zeqaj kërkuan deklarimin e pafajshëm të tij, por kjo kërkesë nuk u mor parasysh nga ana e trupit gjykues. Aktualisht, ky shtetas ndodhet në Angli dhe po përballet me një proces ekstradimi drejt Shqipërisë.
Ilirjan Zeqaj dhe vëllai i tij kanë vrarë me armë zjarri vëllezërit Gramoz dhe Shkëlqim Llanaj. Dy viktimat ishin xhaxhallarët e Santiliano Llanaj, i riu i cili vrau fëmijën Ëngjëllush Zeqaj. Ky i fundit ishte nipi i 50 vjeçarit Zeqaj.
