Ka përfunduar pas rreth 7 orësh mbledhja e grupit të Enkelejd Alibeajt, ku kanë diskutuar për mënyrën se si do të futen në zgjedhjet e 14 Majit, pasi Gjykata e Apelit Administrativ i la vulën e partisë.
Pas mbledhjes, në një prononcim për mediat, Alibeaj deklaroi se fitoren në gjykatë, nuk e konsiderojnë si triumf por përgjegjësi.
“Çfarë iu kam propozuar dhe që gjeti mbështetje te Kryesia është që vendimi i gjykatës së Apelit nuk përbën për askënd kurrsesi ndonjë moment triumfi, revanshi kurrsesi, është një moment i ngarkimit me një përgjegjësi historike e cila është moment i mirë për të rimarrë edhe njëherë energji të reja për fitore. Jam i vetëdijshëm që gjeta të njëjtën konsideratë nga ana e kryesisë, grupit parlamentar apo kolegëve të degëve, jemi të vendosur që sëbashku me demokratët, me shqiptarët me partnerët strategjikë, të forcojmë më tej orientim euroatlantik të PD, një nga elementët themelorë të misionit të PD, fokusi i kryesor janë zgjedhjet e 14 majit”,tha Alibeaj.
Pika e dytë e platformës ishte ftesa e të gjithë demokratëve dhe intelektualëve për t’u bërë pjesë e listës për këshillat bashkiak. Ndërsa pika e tretë kishte të bënte me kandidatët për kryetar bashkie, që sipas tij janë te ftuar të gjithë, edhe ata të Rithemelimit për t’u bërë pjesë e procesit.
PREZANTIMI I PLATFORMËS ME TRE PIKA
1-Lidhur me aleancat PD merr përsipër ndërtimin e një aleancë sa më të gjerë të mundshme të partive të qendrës së djathte me synim maksimizimin e votave, kur secili subjekt formon identitetin e vet.
2-Lidhur me këshillat bashkiak, në bazë të vendimit të kryesisë ju kam propozuar dhe është miratuar që duhet të fillojë nga puna duke ftuar demokratët dhe intelektualët që të bëhen pjesë e listave të këshillave bashkiakë.
3- Lidhur me kandidatët për kryetar bashkie. Ne funksion të bashkimit dhe duke konsideruar Primaret e PD para vitit 2021, votimet me primare nga grupi i rithemelimit dhe kandidatë të tjerë i kam propozuar PD dhe kemi gjetur mbështetjen hapjen pa asnjë kufizim ndaj të gjithë këtyre prurjeve të kandidatëve tanë dikur të propozuar, kandidatëve nga procesi i rithemelimit dhe kandidatura të tjera, me një synim të vetëm daljen me një kandidat të vetëm për çdo bashki.
Alibeaj i përçoi dhe një mesazh Berishës ku kërkoi që të largohet urrejtja dhe mesazhet e përçarjes.
“Ajo që u thashë, është që të heqim të gjithë këtë urrejtje apo sinjale të përçarjes që jepen. Qëndrimi i PD sot është që të dalim me një kandidat unik, fitues bazuar në vlerat që kjo parti ka pasur. Unë kam bërë pesë herë kërkesë që vendimi të përshpejtohej në interes të demokratëve. Ky vendim që nuk është gjë tjetër veçse vazhdim i asaj gjendje që ishte. Nuk kam fituar unë jo, askush nuk ka fituar”, tha Alibeaj.
