Pak ditë më parë Komisioni Qendror i Zgjedhjeve shpalli fituese duke i besuar vulat e sigurisë së zgjedhjeve vendore të 14 Majit kompanisë “Farma Net Albania” të Sokol Topçiut duke i dhënë 720 milionë lekë. Tenderi u shpall në 25 shkurt dhe u mbyll në 1 mars, ndërsa dy ditë më pas u vendos fituesi.
Në garë ishte dhe firma “Agimi B Shpk”, por është skualifikuar. Dy janë faktet që shtojnë dyshimet mbi këtë tender, së pari me negocim, pa njofim dhe së dyti fakti që ishte shumë pranë fondit limit.
Por nga një kërkim i thjeshtë rezulton se kjo nuk është hera e parë që kompania “Farma Net Albania” e Sokol Topçiut fiton tendera në KQZ.
Vitin e kaluar Topçiu ka fituar dy tendera, një për blerje materiale anti-covid dhe një për bojën për zgjedhësit në procesin e pjesshëm lokal të 6 Marsit për bashkitë.
Sokol Topçiu që zotëron rrjetin e farmacive “Farma Net Albania” është një emër i njohur jo vetëm për tenderat, por edhe për drejtësinë.
Në tetor të vitit 2021 gjatë kohës së etheve, frikës dhe panikut nga koronavirusi ai u arrestua si pjesë e një grupi që kishin ngritur një skemë për shitjen e ilaçeve kontrabandë gjatë pandemisë së COVID, por më pas gjykata vendosi që të hetohet nën masën “arrest shtëpie”.
I cilësuar si oligarku i tenderave të shëndetësisë sidomos gjatës kohës së COVID-it që hante nga të gjitha anët, Topçiu sa herë që ka zgjedhje hidhet edhe nga KQZ, ku tashmë i janë besuar vulat për zgjedhjet e 14 Majit pavarësisht të shkuarës.
