Një shpërthim me tritol ka ndodhur mbrëmjen e sotme në një mobileri në Arrameras, Fushë Krujë. Lënda plasëse është vendosur nga persona të paidentifikuar në biznesin e shtetasit Desar Cangu.
Nga shpërthimi raportohen vetëm për dëme të shumta materiale. Bëhet me dije se shpërthimi ka qenë shumë i fuqishëm aq sa janë krijuar shtëllunga tymi në zonë, duke shkaktuar panik tek banorët.
Forca të shumta policie kanë mbërritur në vendngjarje dhe kanë nisur punën për zbardhjen e ngjarjes, si dhe identifikimin e autorit/ve.
Fushë Krujë/Informacion paraprak:
Rreth orës 20:40, në aksin rrugor kryesor “Fushë Krujë-Tiranë”, në fshatin Arrameras, në ambientet e jashtme të një ndërtese (mobileri) të marrë me qira nga shtetasi D. C., banues në fshatin Larushk, Fushë Krujë, ka shpërthyer një sasi lënde plasëse, duke shkaktuar dëme të shumta materiale.
Menjëherë në vendngjarje kanë shkuar shërbimet e Policisë të cilat vijojnë kontrollet në zonë, për kapjen e autorit/ëve. Në vendngjarje ndodhen drejtuesit vendorë të Policisë dhe grupi hetimor dhe në drejtimin e Prokurorisë, vijon puna për zbardhjen e plotë të rrethanave të ngjarjes, identifikimin e kapjen e autorit/ëve.
