“Ju presim më 14 maj për të na mundur sikur na keni mundur më keq se gjatë këtyre 9 viteve. Suksese në jetë dhe deri atëherë, kujdes se byrektorja vijon punën, gjiza ka arritur dhe okllaia po ushtron brumin tjetër për tavën që pret të hyjë në furrën e rindezur. Personin në fjalë do ta shihni vetë”.
Më këtë fjali, kryeministri Edi Rama mbylli shpjegimin në foltoren e Kuvendit për dosjen “McGonigal” që opozita e ka kthyer në kauzë duke e akuzuar për korruptim të shefit të FBI-së dhe u largua nga parlamenti
Kreu i qeverisë pranoi darkat që ka ngrënë me McGonigal edhe 14 herët që përmendet në dosje, por tha se kjo nuk tregon asnjë krim apo kompromentim. Ai tha se nuk ka asnjë provë kundër tij. Hetimi sipas tij po bëhet për lidhjet e McGonigalit me oligarkun rus dhe faktin që nuk i ka raportuar takimet.
Fundi ishte i hidhur dhe një kambanë alarmi për opozitën. Pa përmendur emra ai tha se SHBA po përgatit një tjetër “non grata” por emrin nuk e përmendi duke thënë se shumë shpejt do ta merrni vesh, duke nënkuptuar se e di.
“Asgjë e hatashme, asgjë e qortueshme, as ka ndodhur dhe as nuk shkruhet në aktakuzë. Akat-akuza nuk thotë asgjë, zero. As për mua, as për shtetin shqiptar. Këtu tani rrugët ndahen më shumë se qartë unë në punët e mia si kryeministër, ju në punët tuaj si revolucionar në dëm të Shqipërisë.
E bukura në këtë histeri është se flasin e akuzojnë ata që kur ishin në qeveri paguan miliona nga taksat e shqiptarëve për lobim në SHBA për të na goditur ne duke eksportuar me kamionë lobistësh gjyle të panumërta.
Sikur ‘non grata’ të nxirreshin me lekë si byrek nga sporteli i DASH, vetëm Pandeli Majko do kishte shpëtuar, imagjinoni ku do ishin Fatmiri me Gramoz Ruçin bashkë me mua po e po. Jo “non grata” por s’do dilnim dot nga shtëpia.
Ka 100 vjet që thotë se Amerika blen e dyllos kë të dojë, por bota s’kishte parë gjë akoma por ja që dolët ju nga Lana që thoni se Amerikën e paloska Edvin Kristaq Rama me banim në Surrel dhe një Goni Goni nga Tropoja me banim në Bronz dhe në fund e dylloska një Dori Duçka nga Shqipëria”, tha Rama.
