Emisioni “Stop” denoncon sonte rastin e marrjes së 15 mijë eurove nga një avokat dhe ky i fundit më pas u zhduk.
Bëhet fjalë për avokatin Artan Gjuzi, për të cilin “Stop” ka transmetuar disa raste me mashtrimet e tij dhe qytetarët vazhdojnë të kërkojnë mbrojtjen ndaj tij.
Veli Xhelali dhe Xhevrie Beçi, prindërit e Mateo Xhelilit dhe Izmir Beçit, dy shokë që u kapën duke transportuar dy shtetas marokenë, denoncojnë avokatin se u mori paratë e nuk u dha mbrojtje fëmijëve të tyre. Gjykata i dënoi ata me nga 3.4 vjet secilin.
Avokati Gjuzi u kërkoi 7500 Euro për mbrojtjen dhe 7500 Euro për ditën e vendimit të gjykatës, me pretendimin se ata nuk do të dënoheshin.
Veli Xhelali: Jam babai i Mateo Xhelalit. Ai është dënuar nga Gjykata e Gjirokastra për transport për 2 marokenë nga Gjirokastra drejt Tiranës. Është dënuar 3.4 vite burg. Problemi është te avokati se na ka mashtruar, mbrojtjen na i mori Artan Gjuzi për t’i nxjerrë nga burg. Na i la gjyqin përgjysmë. Me kontratë noteriale na tha 7500 Euro në fillim dhe 7500 Euro në fund kur të dalë nga dera e burgut. I kemi dhënë 15 mijë Euro. Ai nuk erdhi fare në gjyq, bëri dorëheqje.
Xhevrie Beçi: Jam nëna e Izmir Beçit, çunin e kam 30 vjeç, më është kapur në Gjirokastër për klandestinë. Edhe ai është dënuar me 3 vjet e 4 muaj burg.
Por avokati nuk u shfaq fare në gjykatë dhe djemtë u dënuan. Artan Gjuzi mori 15 mijë Euro edhe pse kishte nënshkruar një deklaratë noteriale, ku thuhej se nëse avokati nuk i përmbahej premtimeve, do të kthente paratë.
Veli Xhelali: Pas deklaratës noteriale të Nëntorit, na bën edhe një deklaratë me shkrim dore për të shtyrë afatin. Na i mbushi mendjen. Pas kësaj, bëri akt noterial tjetër për të na shtyrë afatin e dhënies së lekëve. Muaj për muaj na ka shtyrë. Për Vitin e Ri më tha do të t’i jap se s’bën, kaloi Viti i Ri edhe paratë me sy nuk i shikojmë. Aktet noteriale i kam paguar unë.
Veli Xhelali dhe Xhevrie Beçi tregojnë se u munduan ta kontaktonim avokatin, por ai shmangej e fshihej.
Veli Xhelali: Ditën e gjyqit i ka çuar prokurorit të Gjirokastrës mesazh, i ka thënë bëj dorëheqje se një nga ata çunat nuk është përgjigjur në pagesë. Ne paratë ja kishim dhënë.
Xhevrie Beçi: Më thotë rri pa merak se lekët e tua do t’i marrësh. Kemi shkuar gjithëkund duke e kërkuar edhe do t’ua kthej, mos u mërzisni, do t’ua kthej sot, nesër, pasnesër. Unë personalisht nuk e kam takuar më.
Veli Xhelali: I kam bërë denoncim në polici, më kanë thënë me këtë noteri që ke ti ik hap gjyq, s’ka punë policia. Nuk i jam drejtuar gjykatës, erdha te Stop.
Veli Xhelali: Duam paratë të na kthehen mbrapsht siç ja kemi dhënë. Fëmijët na mbetën në burg, dorëheqje bëri, duam paratë siç ja kemi dhënë të na i kthejë.
Xhevrie Beçi: Të zbatojë aktin noterial që ka bërë, të më kthejë lekët se çuni po më vuan dënimin.
Avokati Artan Gjuzi nuk u paraqit në gjyq dhe u zhduk duke mos u kthyer paratë. Gazetarja e Stop shkoi në zyrën e avokatit disa herë dhe aty nuk kishte asnjë njeri.
Në fund, avokati Artan Gjuzi kontaktohet nga gazetarja e “Stop”. Gjuzi edhe një herë premton se do t’ua kthejë paratë qytetarëve.
Avokati Artan Gjuzi: Odeta, të kuptova! Mos u lodh kot të më flasësh aty si zogjt! A do më dëgjosh, apo nuk do më dëgjosh? Të mora me shumë respekt, të më dëgjosh. Nuk ka nevojë askush të ndërhyjë! Do zgjidhet! Unë i kam pranu kushtet e atyre, si kanë dash ato. Edhe njëherë Odeta, i thuaj zotërinjve, të vijnë ta mbyllim atë historinë, dhe do bëjmë deklaratën, që u likujduam dhe mirupafshim. Fjalë burrash, po pa ty, ose pa kamera!
Denoncuesit Veli Xhelali dhe Xhevrie Beçi, tregojnë se pasi foli gazetarja me avokatin, ky i fundit premtoi kthimin e parave më 18 Shkurt. Dhe kështu ndodhi, duke u dhënë 10 mijë Euro.
Pjesën e mbetur të parave prej 5 mijë Euro, avokati Gjuzi premtoi se do t’ua japë në mesin e muajit Mars.
